राष्ट्रिय जनगणना २०७८ को सन्देश
आदरणीय दिदीबहिनी तथा दाजुभाइहरू,
हरेक दस वर्षमा सञ्चालन गरिने जनगणनाको १२औँ श्रृङ्खला राष्ट्रिय जनगणना २०७८ शुभारम्भ भएको अवसरमा सफलताको शुभकामना व्यक्त गर्दछु ।
आजदेखि सुरु भई आगामी मङ्सीर ९ गतेसम्म सबै नेपालीहरूको व्यक्तिगत तथा पारिवारिक विवरण सङ्कलन गर्ने प्रयोजनका लागि केन्द्रीय तथ्याङ्क विभागले मुलुकभरि गणकहरू खटाएको छ ।
सबै नागरिकको पारिवारिक, सामाजिक तथा आर्थिक विवरणहरू सङ्कलन, प्रशोधन एवं प्रकाशन गर्ने समष्टिगत प्रक्रिया नै जनगणना हो । जनगणनामार्फत् उपलब्ध हुने तथ्याङ्क मुलुकको विकास निर्माणसम्बन्धी नीति‚ योजना र कार्यक्रम निर्माणको लागि आवश्यक सूचनाको स्रोत हुनुका साथै राज्यले सञ्चालन गर्ने कल्याणकारी कार्यक्रम तथा सामाजिक सुरक्षा लगायतका सुविधाको प्रक्षेपण गर्ने महत्वपूर्ण आधार रहिआएको छ । त्यसैले, राष्ट्रिय जनगणनामा सही विवरण उपलब्ध गराई आफ्ना छरछिमेकी तथा परिचितलाई समेत सही विवरण टिपाउन सबैले सहयोग गर्नुपर्दछ ।
ठूलो परिमाणमा स्रोत, साधन तथा जनशक्ति प्रयोग हुने र तयारीको लागि समेत लामो समय लाग्ने भएकाले जनगणनालाई महत्त्वपूर्ण राष्ट्रव्यापी कार्यक्रमको रूपमा सफल तुल्याउनु पर्दछ ।
नेपालमा वि.सं. १९६८ देखि जनगणना गरिने कार्यको थालनी भएको हो । एक शताब्दी लामो इतिहास पूरा गरिसकेको जनगणनाका पछिल्ला नतिजाहरू प्रकाशनका रूपमा पनि उपलब्ध छन् । जनगणनाबाट प्राप्त तथ्यलाई नै मुलुकका बारेमा आधिकारिक जानकारीको स्रोत समेत मानिने हुनाले यथार्थ विवरण टिप्ने र टिपाउने कार्यमा योगदान गर्न जनप्रतिनिधि, सामाजिक संघसंस्था एवं सम्बद्ध सबैमा आव्हान गर्दछु ।
अन्त्यमा, राष्ट्रिय योजना आयोग अन्तर्गत केन्द्रिय तथ्याङ्क विभागको सक्रियतामा सुरु हुन लागेको राष्ट्रिय जनगणना २०७८ को सफलताको पुनः शुभकामना व्यक्त गर्दछु ।
धन्यवाद ।
२०७८ साल कात्तिक २५ गते बिहीबार
